الحادثة

حتى لما الليــل
دهن الشوارع ..
وحشر صوابعه الباردة
في شقوق البيوت ..
مافيش ولا جرح صاحي في المدينه
جاله نوم ..

الصهد ..
كان مستخبي في جيوب العساكر
أول ما شاف الضلمة
هجّ ..
وراح يضايق القاعدين على القهوة
يبوّظ المشاريب
وينرفز اللعيبة

إتشتم عيّل
كان لسه أول يوم يستلم شغله
دلق صينية الطلبات
وقال هيروح

القهوجية القدام ضحكوا
لما شافوه
خارج من ممر القهوة
شتموه شتيمة محبة
وقالوا زمانه جايّ ..


الولد
كان بيجري ساكت
هوة ودموعه ..
لدرجة
إن ضلوعه الغشيمة
ماطلّعتش أي صوت
حتى وهي بتندهس
تحت اللوري المحمّل عساكر بردانين
عساكر مستعجلين
بيدوّرا
على حاجة هربت من جيوبهم ..




..................................................




شعر
محمد خير

نشرت في جريدة الدستور يوم 2 إبريل2008