طبعًا عرفت بمنتهى السهولة
إنك كنت هنا
قبل ما اوصل بدقايق
انت فاكر انك لمّا فضّيت الطفاية
وفتحت الشبابيك
عشان تهوي الأوضة وترتبها
يبقى خلاص ؟
مش هاخد بالي
إن روح تانية
اقتحمت مكان وحدتي الوحيد ؟
طب انا مش هاتكلم عن أحزانك
اللي سابتلي بقع سودا ع الحيطان
أوضح من إني ماشوفهاش
ولا عن نور اللمبة
اللي قعدت أحوش في اشعتها سنين
وجيت لخبطتهالي
لأنك كنت مشغول
بمسح آثار رجليك من ع السجادة
هانسيبنا من ده كلهوهاعمل نفسي ماخدتش بالي
لكن يا أخي
معقولة ماخدتش بالك
م المراية اللي ضهر الباب
اللي دخلته برجليك
ما انتبهتش
إنك نسيت صورتك فيها وخرجت؟
صورتك المندهشة
مش هتسيب المراية قبل سنين
وأنا واقف دلوقتي باتطلع فيها بوضوح تام
مع إن زمانك دلوقتي وصلت البيت
ولسة بتنهج من طلوع السلّم
وفاكر نفسك بتلهوس
لأن مراية حمامك
مش عاكسة غير صورة سيراميك الحيطة اللي وراك
بس انا عايز اقولك
قبل ما يغمى عليك م الخوف
أنا فعلا زعلان علشانك
آخر مرة شفتك فيها
ماكنتش بالسذاجة دي
،،،،،،
،،،،،،،
،،،،،،
،،،،،،
شعر
محمد خير
ديوان بارانويا - دار ميريت 2008
