عشر دقايق بس قدامك
عشان تضحك
بعدها
هتضيع الجدوى من الموضوع
وخد بالك
ابتسامة العجز
مش هاتليق عليك
اكتر مابيليق السحاب في صورة ع الحيطة
فخد نفس عميق
قبل اما تغطس
والا احسن لك بقى
تفضل ع الشط معايا
وسط الهدوء المناسب للفرجة
على ذكرياتنا الميتة
مع بعض
معلهش
القسوة ساعات بتكون ضرورية
ما انت الغلطان
صرّخت بشدة لما انقطع النور
واحنا بنتمشى بين تماثيل الشمع
كأنها هتطاردك
ف جريت
وسيبتني واقف وحدي
خايف
تايه
مش عارف : أجري وراك؟
وللا اضحك ع الضلمة كأني ضرير
وانساك نهائيًا
.........
شعر محمد خير
ديوان ليل خارجي
ميريت 2002
2 comments:
يعني إيه ابتسامة العجز ؟
معقولة هي اللي اعرفها ؟ واللي كنت بفكر فيها قبل يومين ؟
مع فرق صغير أو لا فرق كبير .. إنها كانت ضحكة عجز .. !
معقولة هي اللي في بالي ؟
أحلى شي يبقى بعد قراءة قصيدة شعر هو طابور أسئلة فوضوي عارف كل سؤال فيه إنو رح يضل بدون إجابة ،
أعظم الأسئلة هي اللي بدون إجابة
مساءك ورد يا خاطر
Post a Comment