Monday, August 03, 2009

مسكين

طبعًا عرفت بمنتهى السهولة
إنك كنت هنا
قبل ما اوصل بدقايق
انت فاكر انك لمّا فضّيت الطفاية
وفتحت الشبابيك
عشان تهوي الأوضة وترتبها
يبقى خلاص ؟
مش هاخد بالي
إن روح تانية
اقتحمت مكان وحدتي الوحيد ؟
طب انا مش هاتكلم عن أحزانك
اللي سابتلي بقع سودا ع الحيطان
أوضح من إني ماشوفهاش
ولا عن نور اللمبة
اللي قعدت أحوش في اشعتها سنين
وجيت لخبطتهالي
لأنك كنت  مشغول
بمسح آثار رجليك من ع السجادة
هانسيبنا من ده كله
وهاعمل نفسي ماخدتش بالي
لكن يا أخي
معقولة ماخدتش بالك
م المراية اللي ضهر الباب
اللي دخلته برجليك
ما انتبهتش
إنك نسيت صورتك فيها وخرجت؟
صورتك المندهشة
مش هتسيب المراية قبل سنين
وأنا واقف دلوقتي باتطلع فيها بوضوح تام
مع إن زمانك دلوقتي وصلت البيت
ولسة بتنهج من طلوع السلّم
وفاكر نفسك بتلهوس
لأن مراية حمامك
مش عاكسة غير صورة سيراميك الحيطة اللي وراك
بس انا عايز اقولك 
قبل ما يغمى عليك م الخوف
أنا فعلا زعلان علشانك
آخر مرة شفتك فيها 
ماكنتش بالسذاجة دي
،،،،،،
،،،،،،،
،،،،،،
،،،،،،
شعر 
محمد خير
ديوان بارانويا - دار ميريت 2008
 

16 comments:

Anonymous said...

الله يا محمد
هبه ع

mhmd said...

إيه السرعة دي
يا هبة ع
:)

صباحك ورد وحب للدنيا

Unknown said...

بجد فى منهى الروعة

معقولة ماخدتش بالك
م المراية اللي ضهر الباب
اللي دخلته برجليك
ما انتبهتش
إنك نسيت صورتك فيها وخرجت؟
صورتك المندهشة


الصورة دى جتها منين جميلة جدا

mhmd said...

أهلا بيك
تسلم وصباحك فل

أبنوسة said...

سلامات

تقبل وجودي الاول هنا

جميل جدا نصك

بسيط ومليان معاني

صافي الود

mhmd said...

أهلا بك يا أبنوسة في كل وقت
شكرا لمرورك
وصافي المودة

Anonymous said...

انت عارف انا حافظة كل دواينك ابتداء من الاهداء اللى بره وخصوصا الاهداء اللى انت كنت كاتبه لرنا حايك
اغنية نازلة من السما لقلبى

مستنية هدايا الوحده جدا :)

شكرا ً

mhmd said...

ليّ الشرف تحفظي الدواوين والإهداءات
:)
شكرا لمرورك وقرايتك وعقبال ما توقعي باسمك ولو مستعار
:)

صباحك ورد مفتحّ

Anonymous said...

نسيت اوقع فعلا ً ... .. المهم .. هدايا الوحدة امتى باه ؟؟

التوقيع
نيكوليتا كرم

mhmd said...

أهلاااااااااان نيكوليتا

عاش من شافك

تحياتي إليكي اينما كنتِ

هدايا الوحدة قريبا
يفترض يعني
:)
صباحك ورد

Anonymous said...

لاء استنى انا مش نيكولنا كرم اللى انت بتعرفها اكيد

ده اسم قريته فى خمر المسا حليب النهار وشدنى مش اكتر

الواضح ان نيكوليتا دى شخصية حقيقة

mhmd said...

صباح العبث
:)

Anonymous said...

صباح الفل :)
وهو فى ايه اصلا مبقاش عبث :) مجتش على نيكوليتا والا التوفيع
ما تنزل بوست جديد باه من هدايا الوحد يا سيدى تصبيرة

نيكوليتا

Anonymous said...

العبث اليوم هو المعقول
على راى عمنا نجيب سرور

نيكوليتا

mhmd said...

من عينيا
:)

Anonymous said...

حلوة الكسل اووووى يا محمد
حققت وعدك
صحيح مش على المدونة بس المهم انك صبرتنا

نيكوليتا :)