أنصحك
ما تخرجش النهاردة
مش كل يوم
هتبقى رايق كده ..
اسمع نصيحتي
لو نزلت
مش هتعرف تبعد مشاعرك
عن بؤس الشوارع
ولا هتحمي هدومك
من عرق الكآبة
تعالى
بص م الشباك
الحزن اهو
بينقط من غسيل البلكونات
والغيوم دي
ماتخليهاش تخدعك
دي أجبن من إنها تمطر
في غير مواعيدها ..
الأرض
مش مستحملة رجلين جديدة
ممكن تحرّض عليك التراب
والمطبات والحفر
يعكننوا فسحتك
بمليون طريقة ..
ما تخرجش النهاردة
مش كل يوم
هتنسجم مع المزيكا بالشكل ده
هتسيبها وتخرج لمين ؟
دي السعادة
ما فيهاش عزومة
والوحدة
مش أنانية إطلاقًا ..
،،،،،،،،،،،،،،،،،،،،،،،،،،،،،
نشرت في جريدة ( أخبار الأدب ) بتاريخ 18/5/2008
13 comments:
اول تعليق؟؟
انا احب بس اسجل اندهاشي العميق من الزاوية العجيبة جدا اللي بتقتنص منها اللحظة .. زاوية متاحة في خلفية وعينا موجودة وحاسين بيها من غير ما نشكلّها في كلمات
انت بقى بتيجي بكل بساطة وتوجعنا وتفكرنا بيها وبتقصد جدا خالص انك توجعنا حتى ولو مزاجك رايق النهاردة ومنسجم خالص من المزيكا!!!
زيانور
القصيدة دي عجبتني جدا بصراحه شغلك مميز وفيه فلسفة وصور جميلة على قد ما هيه موجعه
رائعة من هنا لبكرة
خصوصا المصالحة الشديدة جدا مع الانسان والحزن والارض
جميل بجد
تحياتي
طبعا أكثر من مجرد نصيحة
دي فلسفة
"
والوحدة
مش أنانية إطلاقًا ..
"
أتبع هذه الفلسفة من زمان
عندما أستيقظ صباحا و أجد نفسي مبسوطا زيادة
إذن : أجازة
أهلا زيانور
أيوه أول تعليق وليا الشرف
ودهشتك العميقة هي قمة طموحي
شكرا لمرورك
أهلا يا نهى
شكرا ليكي
وعدّي عليا باستمرار
تحياتي
مصطفى
خلاص انت مابقش غريب
يا ريت تبقى المصالحة دي برة القصايد كمان
عمرو عزت شخضيا في ليل خارجي
أهلا بيك يا صديقي
جميل انك معايا على نفس الخط ، والفلسفة
تحياتي
انت مدهش حتى في ردودك!!!
ممتنة لك(:
أولا معلش ع التأخير
ثانيا القصيدة كانت منورة البستان
ثالثا مع إنك بخيل ومُقلّ ف أعمالك
لكن مضطر أرضى بكده لو هتفضل تطلع حاجات مدهشة كده على طول
شكلك كده بتعمل بنصيحة محمد صلاح العزب:)
أهلا بيك محمد
يا سيدي مهما اتأخرت هاستناك :) شكرا لكلامك الجميل
ولأ يا سيدي مش هاعمل بنصيحة العزب
:)
ههههه
انا لو قرأت الكلام ده كل يوم
ممكن مخرجش خالص
!!!!
ربنا يوفقك
أهلا بيكي يا
dodda
خلاص ماتقريهوش كل يوم
:)
شكرا لمرورك
Post a Comment