حتى لما الليــل
دهن الشوارع ..
وحشر صوابعه الباردة
في شقوق البيوت ..
مافيش ولا جرح صاحي في المدينه
جاله نوم ..
الصهد ..
كان مستخبي في جيوب العساكر
أول ما شاف الضلمة
هجّ ..
وراح يضايق القاعدين على القهوة
يبوّظ المشاريب
وينرفز اللعيبة
إتشتم عيّل
كان لسه أول يوم يستلم شغله
دلق صينية الطلبات
وقال هيروح
القهوجية القدام ضحكوا
لما شافوه
خارج من ممر القهوة
شتموه شتيمة محبة
وقالوا زمانه جايّ ..
الولد
كان بيجري ساكت
هوة ودموعه ..
لدرجة
إن ضلوعه الغشيمة
ماطلّعتش أي صوت
حتى وهي بتندهس
تحت اللوري المحمّل عساكر بردانين
عساكر مستعجلين
بيدوّرا
على حاجة هربت من جيوبهم ..
..................................................
شعر
محمد خير
نشرت في جريدة الدستور يوم 2 إبريل2008
14 comments:
اهلا محمد انا سعيدة انني وجدت مدونتك وباحب اشعارك اللي متبعاها في الدستور وكمان باستنى الصفحة المتخصصة في الكتب وبعد اذنك نشرت قصيدة غزة في مدونتي بس كتبت اسمك والله ورقم عدد الدستور
شكرا على كل الثقافة وكل المواضيع البديعة اللي بتكتبوها في الدستور
زيانور
أهلا بيكي يا زيانور
يسعدني انك تنشري قصيدتي في مدونتك بس انا رحتها مالقيتش حاجة :) بس عجبني إن وظيفتك الدهشة
على فكرة الصفحة المتخصصة في الكتب بيحررها الزميل سامح قاسم
أما أنا فمحرر صفحة بلكونة ومشربية
شكرا جزيلا على الزيارة
..الصهد
كان مستخبي في جيوب العساكر
أول ما شاف الضلمة
هجّ ..
وراح يضايق القاعدين على القهوة
يبوّظ المشاريب
وينرفز اللعيبة
المقطع دة كابوسي جدا
القصيدة تحفة بجد
شكرا يا مصطفى
ومبسوط بزيارتك دايما
تحياتي
معلش يامحمد جاى متأخر
بس القصيدة جامدة جداً
ربنا يوفقك
وتفضل تبدع كمان وكمان
انا قلتلك رأيي قبل كدا في القصيدة دي بس هقولها تاني
وجعتني اوي علشان كدا بشكرا عليها
شكرا ليك بجد
تحياتي
شكرا يا محمد
تحياتي ليك
ألف شكر يا شادي
أخجلتمونا يا سيدي
تحياتي
ماقدرش اقولك غير يسلملنا كيبوردك
أهلا بيك يا مصطفى
شكرا لك
اهلا محمد من تاني انا لما قلت نشرتها نسيت اقول انها في مدونة تانية عنونها اهوه
https://nourzeyad.arwp.net
وهي هناك من زمان .. معلش غبت
فين الجديد؟؟
خلاص شفتها المرة دي
شكرا ليكي
قريبا هانشر حاجة تانية
يسعدني اهتمامك
تحياتي
رائع
صور مدهشة كعادتك
وسرد غير تقليدي أبدا
الصهد كان مستخببي في جيوب العساكر
رايح يضايق القاعدين على القهوة
اتشتم عيل
سرد رائع فعلا
..........
الولد
كان بيجري ساكت
هوة ودموعه ..
لدرجة
إن ضلوعه الغشيمة
ماطلّعتش أي صوت
حتى وهي بتندهس
مشهد مؤلم وتعبيرك ده مؤلم لدرجة البشاعة
لدرجة ان ضلوعه الغشيمة
مطلعتش أي صوت
وهيا بتندهس
شكرا جزيلا يا معاذ
وأهلا بيك دايما
تحياتي
Post a Comment