أكتر من مجرد نصيحة

أنصحك
ما تخرجش النهاردة
مش كل يوم
هتبقى رايق كده ..

اسمع نصيحتي
لو نزلت
مش هتعرف تبعد مشاعرك
عن بؤس الشوارع
ولا هتحمي هدومك
من عرق الكآبة

تعالى
بص م الشباك
الحزن اهو
بينقط من غسيل البلكونات

والغيوم دي
ماتخليهاش تخدعك
دي أجبن من إنها تمطر
في غير مواعيدها ..

الأرض
مش مستحملة رجلين جديدة
ممكن تحرّض عليك التراب
والمطبات والحفر
يعكننوا فسحتك
بمليون طريقة ..

ما تخرجش النهاردة
مش كل يوم
هتنسجم مع المزيكا بالشكل ده

هتسيبها وتخرج لمين ؟
دي السعادة 
ما فيهاش عزومة

والوحدة
مش أنانية إطلاقًا ..












،،،،،،،،،،،،،،،،،،،،،،،،،،،،،

نشرت في جريدة ( أخبار الأدب ) بتاريخ 18/5/2008  

الحادثة

حتى لما الليــل
دهن الشوارع ..
وحشر صوابعه الباردة
في شقوق البيوت ..
مافيش ولا جرح صاحي في المدينه
جاله نوم ..

الصهد ..
كان مستخبي في جيوب العساكر
أول ما شاف الضلمة
هجّ ..
وراح يضايق القاعدين على القهوة
يبوّظ المشاريب
وينرفز اللعيبة

إتشتم عيّل
كان لسه أول يوم يستلم شغله
دلق صينية الطلبات
وقال هيروح

القهوجية القدام ضحكوا
لما شافوه
خارج من ممر القهوة
شتموه شتيمة محبة
وقالوا زمانه جايّ ..


الولد
كان بيجري ساكت
هوة ودموعه ..
لدرجة
إن ضلوعه الغشيمة
ماطلّعتش أي صوت
حتى وهي بتندهس
تحت اللوري المحمّل عساكر بردانين
عساكر مستعجلين
بيدوّرا
على حاجة هربت من جيوبهم ..




..................................................




شعر
محمد خير

نشرت في جريدة الدستور يوم 2 إبريل2008

جنينة يسري نصر الله

عن  جنينة الأسماك

 

غزة

هاوطّي صوت التليفزيون
إحترامًا للجثث ..

وهالاقي طريقة
أقنع بيها نفسي
إن اللي ع الشاشة
مجرد فيلم
دخل بالغلط في نشرة الأخبار ..

بعد ما ينتهي التصوير
الأمهات
هيمسحوا دموعهم
وهيصحّوا العيال عشان معاد الرضعة
وهما بيفكّوا الكفن عنهم
بشويش ..

الشباب المرميين ع الأرض
( قال يعني مقتولين )
هيقوموا وهما بيضحكوا ..
وهيشتموا المخرج في سرّهم
لإنه بهدل هدومهم ميكروكروم
وبويا حمرا
أكتر من اللازم ..

عربية الإسعاف
هتطلع مجرد ديكور
مافيهاش موتور أصلاً ..

العمال اللي ف الاستديو
هينتظروا - بنفاد صبر -
خروج الجميع ..

وف ظرف 5 دقايق
هيفضّوا المكان
عشان تصوير المشهد الجديد
اللي مش محتاج
غير مؤلف واقعي



،،،،،،،،،،،،،،،،،،،،،،،،،
شعر
محمد خير

نشرت في جريدة الدستور يوم 5 مارس 2008

بارانويا .. ديواني الثاني صدر أخيرًا عن دار ميريت

الصبح دة ..
ماكانش مستعجل ..

حتى لمّا انفتحت الشبابيك في نفس الوقت ..
وطلّوا منها عيال في نفس السنّ ..
وحتى لمّا طارت عصافير بتشبه بعض
ورجعت تكمّل نومها على نفس الشجر ..

ماكانش مستعجل ..
والنجوم ،
فضلت تنقّط نور على نفس الخريطة ..
ونسمة الفجر طالت
لغاية مارعشها البرد ..
سوّاقين التاكسي مالقوش زباينهم ..
فروّحوا في سكتهم بياعين الجرايد ،،


الورد
والتليفزيونات ..
مارضوش يفتحوا ..
والشوارع
بكيت من الوحدة ،،،



ماكانش مستعجل ،،
وساب الليل
ياخد براحو بتنهيدة طفّت الفوانيس
و ابتسامة بتنفرد على مهلها :
مابين سريرنا ..
وقمر
خايفين لياخد باله م الخدعة...

محمد خير
من ديوان بارانويا

في اللحظة الأخيرة

في آخر لحظة
لحق قلبه
قبل ماتطوله الكآبة .. 
وخطفله ابتسامتين 
من ورا حزنه  ،،

كان الغروب باهت
فابتدا يسلي نفسه :
بعدّ  الشروخ اللي اتكونت في حلم امبارح
والاستماع لمزيكا بتتعزف
لحظة مرور موكب قصايد
رايح في اتجاه البحر ..

وحدف  وراه ضحكة
فضلت تلحّ عليه
لحد ما سابها تخرج من شفايفه  ..
واتشفى فيها وهي بتعرف الوحدة  ..

وقرر ينام
 - وهو بيفكر في شكل حلم الليلة دي  -
وفي اللحظة الأخيرة
مع آخر شعاع ضوء راجع للّمض
لمح آخر جواب م البنت
وغمض عينيه  ..

الصبح
كان كل شيء طبيعي جدًا
المفاجأة كانت لمّا شاف ساعته
ولقاها مأخّرة :  عمرين  


 




،،،
 

زياد سحاب .. قريبا في الأسواق

 

رح نبقى نغني  
          
 سي دي جديد للفنان اللبناني زياد سحاب




ويضم السي دي أول تعاون بين زياد والعبد لله
أغنية
أنا قلبي لما حكى

حلم

كانت مبتسمة
ومغمضة عينيها على قصايدك القديمة
فجأة
نفس صفارة القطر بتدخل حلمك
بتصحيك
على زحمة وشمس وهميين في محطة مصر
وكانت عينيها مفتوحين
بتبصلك
وانت بتحاول تبقى حقيقي
بتستعد لاستقبال ذكريات جاية
وبتدي الحاجات معاني مش فيها
للأسف
لسة الفرح والخوف جوة بعض
مقدرتش تقسّم الحياة تفاصيل
للأسف


كالعادة
بعد 8 ساعات تقريبا
هتقف وحدك
في بلكونة في الخامس
في إيديك سيجارة بتلسع الضلمة
مستمتع بالليل
ومستني صبح
مطفي لدرجة محزنة
وكالعادة
هتفاجئك صفارة القطر
فيقوم قلبك
مفزوع
بيلملم مشاعره
وبيجري ع الباب بسرعة
يمكن المرة دي يلحق
أو يرجع ينام









....

شعر محمد خير

ديوان ليل خارجي

دار ميريت 2002